سروشت ناوچهگه بهعزه دارهیلیگ لهتى سهوزه
بووگ و بهر گریگ ، ئهرا نموونه: دار گردهكان ك لهشوونهیل بهرزایى و سهرد
ئهوزهڵ ئهكا، فرهیگ لهناوچهیل كوردستان ئهو شوون گونجیاگه
دیریگ ئهرا گهشهكردن و سهوزكردن ئهو داره.
دار گردهكان دار گهوراى جوانیگهو ئێڵاخیه، كاڵین ئى
داره وه قهڵهم نیهوگ، بهڵكوو وه ناینه، گردهكان یهكیگه له سهرمایهیل
كوردهوارى ك لهشوونهیل فرهیگ قانجاز لهلى كهن و خیزانهیل فرهیگیش له
كوردستان گوزهرانیان ها لهبان بهرههم ئهو داره، وهل ئهوهیشا گردهكان تام
وهلهزهت و خوهشیگ دیریگ و تاڕادهیگ ئهرزانیشه لهوڵات
خوهمان ئهرا سهندن.
گردهكان دو توكڵ دیریگ ، یهكیگیان سهوزهو نهرم كهفیگه
بان، ئهواكهیش سهختهو قایم كهفیگه ژیر، ناوك گردهكانهگهیش ها لهناو ئهو
توكڵهیلهو ئهرا خواردن وهكار تیهیگ ، ئمجا له توكڵ دارهگه ماددهیگ
ههس وهكار تیهیگ ئهرا ڕهنكردن بهن، وهتایبهت ئهرا ڕهنگكردن قالى و
گڵیم و چشتهیل تر نهف لهلى وهرگردیان.
لهكتاو زیندهوهرهیل هاتگهو ئویشیگ : دار گردهكان وهل هویچ داریگا ههڵناكا، ئمجا شارهزایهیل ئویشن ئى داره نزیكهى 300 ساڵ ژیهیگ ، وهل ئهوهیشا نوڕید له قودرهت خودا ئهو داره تا ههسهى ههر بهر گریگ و بهرههم دهیگ ، لهههمان وهخت توكڵهگهیشى ئهگهر بسزنید و بنهیدهى بان ههر زهخم و بڕیانیگ خاسیهو ئهكا، چوینكه ئهوسا له كوردهوارى ئى چشته تاقیهو كریاگهو ڕاسه، بیجگه ئهوهیش له كوردهوارى خوهمان ئویشن ئهگهر بایگ و گردهكان وه توكڵهگهیهو بسزنید و بهیدهى له موى، ئهو مویهگه سیهوه ئهكا، وهلى پیشینهیل ئویشن خهفتن لهژیر دار گردهكان لهش قورسهو ئهكا دار گردهكان لهیوا ههس نزیكهى سهد ههزار گردهكان گریگ و ههر وه قایمى مینیگهوه. وهلى لهیوا دیاره گردهكان تا وهختى لهدار كهنیهیگهوه حهزهو خوهر نیه، ههر لهوهر ئهوهیش دوینیم دارهگه گهڵاى پانیگ دیریگ و نیهیلیگ خوهر بڕهسیگه بهرهگهى و بنهگهى. لهباوهت قهدر ئى داریشه لهكوردهوارى، وهتایبهت لهلاى ئهوانهك لهلى دیرن و ئمایهتى كهن فره پیرووز و قهدرداره، لهههمان وهخت لهلاى گشت كوردیگیش گرینگى یا ئههمیهت تایبهت خوهى دیریگ و خوهشهویسه لهلاى كورد، جویر دار بهڕوى و بایهم و دارهوهن و دارهیل تر كوردستانهگهمان.
